المهزلة - علاء أشرف | من أفضل دواوين 2021

 في ٢١ قصيدة بتدخل مع الكاتب في عالم تاني بيجمع بين الخيال والفانتازيا والشعر، بيحمل بين طياته تجربة مهمة عن الحياة والإنسانية وكل الظروف الـ ممكن تخلي انسان يبعد عن شكله الآدمي.

 "ضد الإنسان إنسان ف الضِّد!

 ضد الأوطان تهميشة أهل الأوطان!

 مفاقيد بنودَّع فـ المفاقيد ومافيش م الحزن دموع فُرقة لو تسقي القبر هتنبِّت موْتى الإنسان!"

"النور مش جاي من عند الشمس!

 للعالم كشاف متسلَّط بينوَّر جهل ربنا متبرَّأ من دولة بتصدَّر فينا الموت السهل واليُتم يجوز عادي نخطِّيه لو يُتم بجد مش يُتم برغم وجود الأهل"

  "وان جاع فـ مرَّة الدود يحلى في عينُه الدود"

 "دوِّن تاريخ العاصمة من بُق أهل العاصمة 

 مش من ضيوف الغَصب مواليد الشَّتات"

 "مش عارف إيه فضل الإنسان غير إن الناس بالناس بتموت" 

 "من حق الدود يطلع يحتج!

 الناس بتروح له رماد محروق" 

 "قل أستعيذ بالله من زنزانات الانفرادي في السجون شهقة عياط في مرَافعة المسجون مـ القاضي لما يحرَّف الآية والدمع لما يخون" 

 "والخلق قالعة رحمة الرحمن" 

 "كان لسة خام القلب بالسّّلوفان" 

" قبلِك قبل امَّا اقابلِك في المُدَرَّج وارتِبِك! قبل اما تلسع شوقة نن وقلب!"

 "كدا كدا بنقرَّب تدريجي أيام ويطُل (الله) ونطُل عليه لو كُنا خُفاف أولَى الرَّايحين هَيتابعوا بقية المشهد من فوق وانا بـ اكتب ببصيرة الشفاف علشان لو شَم الموت ريحتي أفتح له فـ صدري ودراعاتي مايجوش في الآخرة يعايروني ويقولوا ده خاف!"

 - الديوان سهل ممتنع، أفكاره قوية تحمل مغزى قوي وممكن البيت يتقرئ أكتر من مرة علشان تفهمه.

 - الكاتب عبقري في صور كتير جداً، وربط الواقع والمنتشرة بالديوان والشعر، فالقاريء هيحس بأُلفة وأهمية المكتوب.

 - بداية الديوان في رأيي مكانتش منصفة إلا إن التجربة كاملة تكاملت بالوقت - ليه بقول كدا؟

 - أولاً لأني حسيت بهنات واضحة، وعلاء شاعر شاطر بيقدر يتغلب عليها في الإلقاء. 

- ثانياً إن في الديوان نفسه حاجات اقوى من البداية إلا إنها لم تضعِف الديوان في شيء 

- الديوان يستحق القراءة بجد وهو مميز 

- غلاف الديوان سهل ممتنع، لأول وهلة تبص تقول حلو جدا وسهل، وتتعمق تلاقي كل تفصيلة مذكورة بتتشكل قصاد عينيك لذلك برافو لإسلام  

 "أنا واقف بـَ اخلَص بالرَّاحة ومفيش أحياء في الكون غيري" 

وأتمنى من كل قلبي ياخد جايزة تنصفه