"دُور العبادة مش أهم من البارات..." ديوان أصحاب الياقات الزرقا

نبذة عن الديوان:
في ٣٧ عنوان ما بين قصائد وهوامش، بياخدنا الكاتب في رحلته الثانية، بعد "آخر فرسان الموهيكانز"
- أول ما مسكت الديوان وقرأت اختياره عالغلاف وقفت:

"دُور العبادة مش أهم من البارات
الكل واصل فيها للروح الجلية
بس اللي فارق في الوصول النية"

- الكلام هنا صعب رغم منطقية الكاتب فيه، ولكن ليه لأ لما نشوف.

"دقق تلاقي المعضلة إنك بجهل
أجرمت في حق البشر لما آمنت بحبهم للخير
ودبحت قلبك ع الموائد كلها
ووهبت دمك للجميع بضمير"

"يا دار حبايبي في البَعيد الغير بَعيد أنا دار
قادرة تحاوط قلبكم من قسوة الأقدار
مش ذنب داري إنها متحاوطة بالأسوار
ولا ذنب قلبي رُعبه يهجم ديب عليه
الشوف زيادة عن اللزوم وسط البشر بيعِل"

"أنا غير مُخيِّر ولكن مصمم على التجربة"

"تشرَحني ضحكة أبويا وكلامه وسكوته
يارب خُد من عمري وما اشوفش يوم موته"

- للشاعر جسارة واضحة في نغماته وبحوره، بيقول:

"عشان لما تخلف ظنوني المراكب
وما اوصلش أبداً بلاد الحبايب
وما اسمعشي نفسي في صوت المَكن
يكون حلمي فرَّع وأصبح وطن"

- الديوان متقسم لعدة لوحات، كل لوحة بتشمل مجموعة قصائد معظمها بيشمل فكرة واحدة ألا وهي (كراكيب في روح الشاعر) واستعان بالبحر وكأنه مستمع جيد ومحارب ساعات وحاجات كتير أهمها (الغُربة ومعاناته معاها)..
- ولأن لكل منا فلسفته الخاصة، فالشاعر بدأ يوصف كل لوحة بشكل مختلف بحيث أنه ينتجلك ديوان متكامل بالشكل دا، فيه سياسة، فيه رومانسي، فيه جانب اجتماعي وأسري وجوانب من البوح، وفيه جانب تعارضت معاه كلياً بسبب معتقداتي الشخصية
-
- يقول:

"الله ..
اللفظ دا أصدق معاني اللهفة لما بشوف عنيكي
باجري عليكي..
وكعوبي سايحة في التراب
والدم سايل غصب عني ومش هاقول لك ليه حزين
متشعلقة فيا الوعود ..
والرؤية باهتة / مزيفة علشان مفيش منك ردود ..!"

" الذكريات أسوأ من الحاضر بكل ما فيه
سِم اللي فاكر كل شيء وبيعمل إنه ناسيه"

- فيه كام قصيدة سابوا علامة في قلبي أهمهم ما كتبه لوالده، ولحظة ما اكتمل نقصي.

"اللي قال لك الحياة صافية وبريئة
بص جوة عنيك وغشك
اوعى يا ابني وانت ويَّاك الحقيقة
واتهزمت تلف وشك"

"كُن حِنيِّن ع الغلابة / ربنا خلقك حِنيِّن"

 "عمري ما اقفل يوم ضلوعي في وش قلبك
عمري ما أصبح سيف في جنبك
خدني صاحب يا حبيبي واتسند"

"هابقى وتدك يا حبيبي وعضم ضهرك وقت ضعفك"

"قلبي من دلوقتي مؤمن حد فقد الروح في ضمة
خَرْ ساجد للي خَلَقُه لما شاف ست العذارى
روحي من دلوقتي صافية حد تجريحها بكلمة
خف كل النقص فيَّا واكتملت بحضن سارة ..!"

- الغلاف مميز وكأنه مقسم ل٣ لوحات، السما ومداها الواسع، السفينة وغروب الشمس في قلب البحر، وأخيراً مجموعة من الشباب المكافح في غربته على مركب.

- يستحق القراءة